Një person rreth 31 vjeç ka humbur jetën në orët e para të së martës në Gjakovë, si pasojë e plagëve të marra nga një mjet i mprehtë.

Zëdhënësi i policisë për rajonin e Gjakovës, Sheremet Elezaj, ka bërë të ditur se, bazuar në hetimet fillestare, dyshohet se rreth orës 02:20, pas një mosmarrëveshjeje në rrugën “Mbretëresha Teutë”, viktima është sulmuar nga një person, i cili ndodhet në arrati.

“Sot, në orët e hershme të mëngjesit jemi njoftuar se një person madhor është dërguar për trajtim mjekësor si pasojë e lëndimeve të shkaktuara nga një mjet i mprehtë. Fillimisht është dërguar në QKMF dhe më pas në Spitalin e Përgjithshëm në Gjakovë, ku edhe ka ndërruar jetë”, ka deklaruar Elezaj.

Ai shtoi se njësitë kompetente policore kanë dalë menjëherë në vendin e ngjarjes dhe, në konsultim me Prokurorin e Shtetit, është iniciuar rast “Vrasje”.

Aktualisht, po ndërmerren të gjitha veprimet e nevojshme operative dhe hetimore për zbardhjen e plotë të rrethanave të rastit.